அமெரிக்காவில் மான்களுக்கு ஒமெக்ரோன் வைரஸ் தொற்று விலங்குகளில் இருந்து புதிய
திரிபுகள் தோன்றும் ஆபத்து? கொரோனா வைரஸ் நெருக்கடியில் இருந்து உலகம் விடுபடத் தொடங்கியுள்ள போதிலும் புதிய வைரஸ் பிறழ்வுகள் பற்றிய அச்சம் இன்னமும் நீடிக்கவே செய்கிறது. நியூயோர்க்கில் பரவலாகக் காணப்படுகின்ற வெள்ளை வால் மான் இனங்களில் ஒமெக்ரோன் தொற்றுக்கள் இருப்பதை ஆராய்சியாளர்கள் கண்டறிந்துள்ளனர். மான்களும் ஏனைய காட்டு விலங்குகளும் புதிய திரிபுகளை உருவாக்க முடியும் என்று நம்புவதற்கான ஒரு சான்று இது என்று நிபுணர்கள் அச்சம் கொண்டுள்ளனர்.பென் பல்கலைக்கழக அறிவியலாளர்களும் (Penn State University), லோவா மாநில இயற்கை வளத் திணைக்கள ஆராய்ச்சியாளர்களும்(Iowa Department of Natural Resource) இணைந்து வெள்ளை வால் இன மான்களில் (white tailed deer) வைரஸ் பரிசோதனைகளை நடத்தியுள்ளனர். அது தொடர்பான முதற்கட்ட பூர்வாங்க அறிக்கை வெளியிடப்பட்டுள்ளது. நூற்றுக் கணக்கான மான்களில் பரிசோதனை நடத்தப்பட்டது.அவற்றில் மூன்றில் ஒரு பங்கு மான்களின் உடல் திசுக்களில் ஒமெக்ரோன் வைரஸ் தொற்றுக்கான உடல் எதிர்ப்புத் தூண்டல்கள் அவதானிக்கப்பட்டுள்ளன.
‘நியூயோர்க் ரைம்ஸ்’ பத்திரிகையின் தகவலின் படி, மான்களில் வைரஸ் நீண்ட காலம் – பரந்துபட்ட அளவில் – பரவுவது அவற்றில் புதிய மாறுபாடுகள்(mutate) உருவாக அதிக வாய்ப்பாக அமையலாம் அதன் மூலம் தோன்றக் கூடிய புதிய வைரஸ் திரிபுகள் ஏனைய காட்டு விலங்குகளுக்கும் மனிதர்களுக்கும் பரவும் ஆபத்து உள்ளது – என்று தெரிவிக்கப்படுகிறது. விலங்குகள் மனிதர்களைப் போன்று பரிசோதனைக்கு உள்ளாகுவதில்லை. அவற்றில் காணப்படுகின்ற திரிபுகள் சோதனைக்குள் பிடிபடாமல் (unchecked)
நீண்டகாலம் மறைந்து பரவிப் புதிய மரபு மாற்றங்களை உருவாக்குவதற்கு அது வாய்ப்பாகும் என்பதை நிபுணர்கள் சுட்டிக்காட்டுகின்றனர்.
அமெரிக்காவில் சுமார் முப்பது மில்லியன் வெள்ளை வால் மான்கள் உள்ளன.வீட்டு வளர்ப்பு விலங்குகளைப் போல அன்றி அவை கூட்டமாக வாழ்வதால் அவற்றில் வைரஸ் வேகமாகப் பரவுவதற்கான வாய்ப்புகள் அதிகம். அத்துடன் அவை மனிதருக்கு நெருக்கமான பகுதிகளில் நடமாடுகின்றன. எதிர்காலத்தில் அவற்றில் தோன்றக்கூடிய புதிய ஆபத்தான திரிபுகள் மனிதருக்குத் தொற்றுவதற்கான ஏதுநிலை அதிகமாக உள்ளது.
எலிகள், காட்டு அணில்கள், காட்டுப் பூனைகள், மிங் விலங்குகள் போன்றவற்றின் வரிசையில் மான்களும் வைரஸ் தொற்றுக்கு இலக்காகக் கூடிய தன்மை வாய்ந்த விலங்கினமாகப் பட்டியலிடப்பட்டுள்ளன.
(படம் :நன்றி New York Times)
செய்தி ஆசிரியர் மூத்த ஊடகர் குமாரதாஸன். பாரிஸ்
